बातमी:
कल्याण-डोंबिवली महापालिका (केडीएमसी) हद्दीतील डोंबिवली पश्चिम, राजूनगर परिसरातील एका इमारतीच्या बांधकामावरून मोठा वाद निर्माण झाला आहे. शिवसेना (शिंदे गट) चे नगरसेवक विकास म्हात्रे यांनी संबंधित प्रकल्पात गंभीर अनियमितता झाल्याचा आरोप करत केडीएमसी आयुक्तांकडे अधिकृत तक्रार दाखल केली आहे.
म्हात्रे यांच्या आरोपानुसार, संबंधित इमारतीला १४ मजल्यांची मंजुरी असताना प्रत्यक्षात २१ मजली इमारत उभारण्यात आली, म्हणजेच अतिरिक्त सात मजल्यांचे कथित अनधिकृत बांधकाम करण्यात आले आहे.
केडीएमसी हद्दीतील अनधिकृत बांधकामांच्या प्रकरणांवर आधीच प्रश्नचिन्ह उपस्थित होत असताना हा प्रकार समोर आल्याने नगररचना विभागाच्या कार्यपद्धतीवर पुन्हा एकदा चर्चा सुरू झाली आहे. या प्रकरणात बिल्डर, वास्तुविशारद आणि संबंधित अधिकाऱ्यांच्या कथित संगनमतामुळेच हे बांधकाम झाल्याचा आरोपही करण्यात आला आहे.
नगरसेवक विकास म्हात्रे यांनी या संपूर्ण प्रकरणाची निष्पक्ष व सखोल चौकशी करून दोषींवर कठोर कारवाई करण्याची मागणी केली आहे. तसेच नियमांचे उल्लंघन करणाऱ्यांना कोणतीही सवलत देऊ नये, अशी भूमिकाही त्यांनी मांडली आहे.
या प्रकरणावर आता केडीएमसी प्रशासन काय भूमिका घेते आणि चौकशीत कोणते निष्कर्ष समोर येतात, याकडे नागरिकांचे लक्ष लागले आहे.
0 Comments